Akizungumza jana kuhusu taarifa ya soko katika mauzo yaliyofanyika wiki iliyopita, Meneja Miradi na Biashara wa DSE, Patrick Mususa, alisema idadi ya mtaji wa soko imeshuka kutoka Sh trilioni 21.0 hadi Sh trilioni 20.2.
“Kiasi hicho kinaonesha kuwa bei za hisa za makampuni zimepungua kwa asilimia 3.9,” alisema Mususa wakati akitoa taarifa ya DSE kwa mnada uliofanyika wiki iliyopita.
Aliongeza kuwa idadi ya mtaji wa makampuni ya ndani imeshuka pia kutoka Sh trilioni 9.7 hadi Sh trilioni 9.4.
Katika mnada huo, Benki ya CRDB ilichangia zaidi ya asilimia 75 ya idadi ya mauzo yote ya wiki iliyopita, ingawa bei ya hisa zake ilishuka kwa asilimia 1.23.
Alisema idadi ya mauzo ya hisa, imeongezeka wiki iliyopita yameongezeka kwa asilimia 50 hadi kufikia Sh bilioni 6.7 kutoka bilioni 4.4.
Idadi ya hisa zilizouzwa na kununuliwa, imepanda zaidi ya mara nne hadi Sh milioni 12.8 kutoka milioni 3.6.
Alitaja kampuni tatu zinazoongoza kwa idadi ya hisa zilizouzwa kuwa ni Benki ya CRDB kwa asilimia 98.45, Kampuni ya Bia (TBL) asilimia 0.75 na Kampuni ya Saruji Tanga (TCCL) kwa asilimia 0.34.
“Hii inaonesha kuwa CRDB ilichangia zaidi ya asilimia 75 ya idadi ya mauzo ya wiki hii ingawa bei yake ilishuka kwa asilimia 1.23,” alisema Mususa.
Kwa upande wa viashiria, Mususa alisema kiashiria cha sekta ya viwanda kimeshuka kwa pointi 4.33, kikiwa kimechangiwa na punguzo la bei ya hisa kwenye kaunti za TCCL kwa asilimia 0.75 na Kampuni ya Saruji ya Twiga (TPCC) kwa asilimia 0.67.
Alisema kiashiria cha sekta ya huduma za kibenki na za kifedha, kimeshuka kwa pointi 113.23, kikiwa kimechangiwa na punguzo la bei ya hisa kwenye kaunta za Benki ya NMB kwa asilimia 6.12 na CRDB kwa asilimia 1.23.
“Kiashiria cha sekta ya huduma za kibiashara kimeshuka kwa pointi 16.75 kikiwa kimechangiwa na punguzo la bei ya hisa kwenye kaunta ya Swissport kwa asilimia 0.55,” alisema Mususa.
