Magufuli ahakikisha ushirikiano na Israel

RAIS John Magufuli amemhakikishia Waziri Mkuu wa Israel kuwa Serikali ya Awamu ya Tano ya Jamhuri ya Muungano wa Tanzania ipo tayari kushirikiana na kuimarisha zaidi mahusiano kati ya Tanzania na Israel katika nyanja mbalimbali ili kuleta manufaa kwa pande zote.

Rais Magufuli alisema hayo alipokutana na kufanya mazungumzo na Balozi wa Israel nchini mwenye makazi yake jijini Nairobi, Kenya, Yahel Vilan, Ikulu jijini Dar es Salaam. “Natambua mahusiano mazuri yaliyopo kati ya Tanzania na Israel, mahusiano haya ni muhimu sana kwa ustawi wa nchi zetu mbili, nataka mahusiano haya yaimarishwe zaidi,” alisema Dk Magufuli.

Aidha, aliahidi kuwa Tanzania itahakikisha inaanzisha ubalozi wake nchini Israel haraka iwezekanavyo. Kwa upande wake, Balozi wa Israel nchini, Vilan pamoja na kumpongeza Rais Magufuli kwa kazi kubwa na nzuri iliyofanywa na uongozi wake katika kipindi kifupi cha miezi miwili tangu aingie madarakani, amemhakikishia kuwa Israel itaendelea kushirikiana na Tanzania na ipo tayari kuimarisha zaidi mahusiano.