Miradi hiyo ni ujenzi wa shule ya msingi Kingolwira Manispaa ya Morogoro, ujenzi wa uzio wa shule ya msingi Muyuni iliyopo Wilaya ya Kusini Unguja na pamoja na kuiwezesha vifaa Hospitali ya Kanisa la Kiinjili la Kilutheri Tanzania (KKKT) ya Selian jijini Arusha.
Akizungumza katika hafla ya kutia saini makubalino hayo, Balozi wa Japan nchini, Masaharu Yoshida alisema wametoa msaada huo ikiwa ni mwendelezo wake wa kusaidia miradi ya kijamii kama afya, elimu na maji.
Balozi Yoshida alisema mradi wa kwanza ni wa upanuzi wa shule ya msingi Kingolwira iliyojengwa tangu mwaka 1952, ambayo majengo yake ni chakavu na hivyo kufanya watoto na walimu kusoma katika mazingira hatarishi.
“Shule hii ilijengwa miaka 63 iliyopita, majengo yake kwa sasa ni chakavu na yanahatarisha usalama wa watoto na baadhi ya madarasa yamejaa watoto zaidi ya 180 na wengi wao wakiwa wamekaa chini na walimu wakiwa wamekaa chini ya miti,” alisema Balozi Yoshida.
Alisema kiasi cha dola 86,182 sawa takribani Sh milioni 190 zitatumika katika ujenzi wa madarasa matatu, ujenzi wa ofisi za walimu na vyoo shuleni hapo.
Mradi mwingine ambao utagharamiwa ni ujenzi wa uzio katika shule ya msingi Muyuni Wilaya ya Kusini Unguja Mjini, ambao utagharimu dola 29,799 ambazo ni sawa na Sh milioni 64.
Balozi Yoshida alisema kukosekana kwa uzio katika shule hiyo, kunafanya watu kupita na kuathiri watoto wakiwa darasani wakiendelea na masomo.
Mradi mwingine ambao Serikali ya Japan imetia saini kuwezesha ni ule wa kuisaidia Hospitali ya Selian jijini Arusha, vifaa tiba ambao utagharimu dola 88,319 sawa na Sh milioni 192.
Wakizungumza baada ya kutia saini makubaliano hayo, wawakilishi kutoka taasisi hizo waliahidi ubalozi wa Japan, kuitumia misaada waliyopata kama ilivyo kusudiwa.
Mwakilishi wa Hospitali ya Selian, Samuel ole Saigura alisema msaada huo utatumika kununulia vifaa tiba na kuboresha huduma katika idara ya wagonjwa mahututi (ICU) hospitalini hapo.
Mkurugenzi wa Manispaa ya Morogoro, Theresia Mahongo alisema kuwa msaada huo utawanufaisha walimu na wanafunzi wa Shule ya Msingi Kingolwira na utaleta manufaa kwa wakazi wote wa Mkoa wa Morogoro na taifa kwa ujumla.
