Kukamatwa kwa watu hao, wanaosadikiwa ni wa Bonde la Mkwajuni jijini Dar es Salaam, kunatokana na kile kilichodaiwa ni kufunga barabara baada ya maofisa wa Mamlaka ya Udhibiti na Usimamizi wa Mazingira (NEMC) kuweka alama ya X katika vibanda walivyojenga watu hao kwa ajili ya makazi.
Kamanda wa Polisi wa kanda hiyo, Simoni Sirro alisema wakazi hao watahojiwa kueleza sababu za kufunga barabara hizo na kusababisha kukosekana kwa mawasiliano.
Vurugu hizo zilizotokea jana saa 6 mchana, inadaiwa zilisababishwa na baadhi ya vijana wanaoishi katika maeneo hayo, ambao walichoma matairi pande zote za barabara na kusababisha foleni na usumbufu kwa watumiaji. Polisi na gari la zimamoto lilifika eneo hilo kwa lengo la kuhakikisha usalama wa watumiaji wa barabara hiyo na wananchi wengine.
Akizungumza na gazeti hili, Mkurugenzi Mkuu wa NEMC, Bonaventura Baya alisema walichofanya wananchi hao, si sahihi kwa kuwa walishaelezwa kwamba vibanda hivyo vingeondolewa katika eneo hilo.
Akielezea kilichojiri, Baya alisema jana asubuhi alikwenda eneo hilo kwa ajili ya kukagua kazi iliyofanywa na wafanyakazi wake na alipokuwa anaondoka, aliona vijana wanarusha mawe na kuchukua mbao na matairi na kuchoma moto katikati ya barabara.
